名古屋 - 千里馬藥局

如 果大家有機會去名古屋，一定要o黎呢間藥局睇睇，呢度除左 2 - 4 樓賣藥品，化妝品之外，地下o個層有好多零食賣，而且全部都好平，比出面平幾十至幾百 yen 都有架，例如一盒"飛之膏"要 7xx yen 呢度只要 630 yen，另外一盒卡樂 B 薯條係便利店賣緊 148 yen 呢度賣 100 yen，我都係千里馬度執到唔少平貨！

如果我無記錯，係高島屋背住四條電動樓梯一直行到尾會有個小廣場，係對面馬路有間好大既 Bic Camera，千里馬就係廣場既左邊．

秋日紅葉飄雪日本中部六天自遊行 2007 - 後記

今次日本中部行程都算輕鬆，因為白川鄉同高山都係o的鄉村小城市，o的舖好早都收工，無野行自然返旅館休息，所以唔會好似係東京咁行到夜一夜，去旅行變左去勞役咁。以下係我少少對香港服務員既感想。

1. 機場 3 個服務員好唔專業，事原我聽我朋友話 123 係日本打 home call 會比慢遊 IDD 平，於是我去 3 度問佢地有無呢個服務，但係個職員就話想係日本打電話一係要 3G 機加 3G plan，一係就買張慢遊儲值咭，我聽完之後心諗唔係呀麻，個個台都可以 3G 機加 2G plan 係日本打電話返香港架啦，3 反而唔得？！後尾我去到日本照開個電話一樣可以用囉... 好彩無比佢呃而買張儲值咭。
2. 機場 check in 時 CX 個地勤空姐問都無問就將我地 5 個人分到散哂，上到機我地先知，機倉空姐就好好人叫我地坐底先，等o的人上哂機就幫我地掉位，不過後尾我地自己搞掂左，係呢度多謝o個日o個位空姐。

秋日紅葉飄雪日本中部六天自遊行 2007 - DaY sIX

11月15日

今日返香港啦，係酒店執好行李，跟手落 lobby check out，將o的行李寄存係酒店先，又出去買手信啦。

由於搭下午 4：30 分機返香港，大約兩點鐘要去到機埸，買哂手信搭 1：32 分火車去機場。

個機場好大，拍得住香港機場，但人流唔多，行o的舖頭行得好舒服。另外二樓商店及食店裝修得好有特色，一邊係古代日本式而另一邊係歐陸式，好靚。

日本古代 feel

歐陸式

係機場都係離唔─開購物，我因為唔想再用o的紙幣而忍手唔買，不過都買左個麵包超人交剪比我個妹。買o個時唔記得交剪唔可以 hand carry，過關時比人查先醒起唔帶得，心諗慘啦，side 哂o的錢，我問個工作人員可唔可以寄快遞，佢望望我本 passport 又望望隻錶，跟住嘆口氣話唔得，不過除左交剪之外既野都可以拎走。咁都無咁傷，於是我就拎走個交剪套同個包裝，好彩個交剪無乜圖案o者。

秋日紅葉飄雪日本中部六天自遊行 2007 - DaY FivE

11月14日

今 朝搭 8：00 班車返名古屋，車程要 2 個鐘零 45 分，起初個天重灰灰地，好彩之後見返藍天白雲，落左幾日雨終於好天啦，遺憾係白川鄉落雨影唔到靚相。約 10:45 分到達名古屋，去到酒店因為太早未到 check in 時間，唯有放底行李係酒店 lobby，跟住出去行行。

買張名古屋地鐵一日卷，方便來回。搭地鐵去明城公園，搭幾個站好快到。個公園好普通，無乜做保養，花花樹樹都好舊，好少見日本政府會咁唔理。

好休閒

無幾遠就係名古屋城，本來想慳錢唔入場就咁係出面睇，不過原來出面係睇唔到既，唯有放棄繼續去 shopping。

我地去左名古屋最大既地下商場行，o個度有好多食店鋪頭，行到累我地入左一間咖哩店食午餐，呢度好香咖哩味，重有好多唔同款既咖哩飯任君選擇。我簡左個咖哩雞湯 set，其實都幾好味，不過相比起佢地食既咖哩飯就唔夠香濃喇。

食飽飯返酒店 check in 後再搭地鐵去名古屋附近行街加 shopping，又幫個朋友買左個最新款既狗仔袋，店員話o岩o岩出左五日，夠哂新鮮熱辣。

食手行去附近食鰻魚飯，呢度o的鰻魚係用炭燒出黎，好香又夠脆同多汁，正。

 

 真係用炭燒o架

之後去左‘千里馬’買手信，呢度o的手信好平，我地係度狂掃零食，‘千里馬’樓上重有幾層係賣化妝品同埋藥品，價錢比一般店舖平，個個係呢度都買得好盡慶。

買完野返酒店休息。

秋日紅葉飄雪日本中部六天自遊行 2007 - DaY FOuR

11月13日

係酒店食左早餐後出發去參觀宮川朝市，朝市營業時間只係上午幾個鐘，到十二點就收哂架啦，條街唔係好長，一陣間就行得哂，多數賣蔬菜同漬食品。

o的蘋果好爽，唔會太粉，連我呢個唔好蘋果既人都覺得好食，後悔無買返香港...

o的辣椒綁到好似條孖鞭咁，好攪野

跟住行去出頂睇高山市全境，今日陰天有幾滴雨，比尋日好左好多，上到山頂出左一陣太陽，影出黎靚好多。

影左一大輪相，跟住去食午餐，今日食 udon，呢間係以手打 udon 出名，我叫左一客天婦羅 udon，味道都幾好，不過 udon 唔係好彈牙。

 

食飽後因為各人既相機開始無電，所以決定返酒店差一差電先再出發。

休息左約一個鐘，見個天開始有返太陽，我地即刻起行去另一個景點 - 飛驒古川。

由高山站去飛驒古川搭火車只係需要十幾分鐘，沿途天氣開始放晴。飛驒古川係一個好細既市鎮，我地係咁易行一行差唔多行左大半個飛驒古川。

飛驒古川出名既景點只得兩個，一個係條小河流，條河流真係好細好短，可能呢兩日都落雨所以o的水好俗唔清，由於真係太短唔使好耐就行哂，跟住就去另一個景點 - 古街。

古術亦唔係好長，大約兩至三個街口，有好多地道野賣，我地試左一串飛驒牛串周燒魚餅，兩樣都好普通，牛串要 ￥500，又貴又麻麻地，好彩係 share 食o者。

行下行下，我地去左另一邊食炸牛肉餅，佢o的 ham 係用飛驒牛加薯仔炸，￥200 一個好大個，o的皮炸得好脆，可惜太大個加上好油又肥，又無乜味，食到一半巳經唔想食，不過唔想 side 野格硬食哂。之後就搭火車返高山市。

返到高山市我地去左便利店掃貨，之後行去旅館附近一間叫松喜壽司食壽司。

入 到去得個嬸嬸識講少少英文，份英文 menu 又太簡陋唔識睇，又唔想食 set 因為唔想食個o的卷物，又驚叫 omakase set 會好貴喎，後尾有個師傅走埋黎話幫我地簡，經我地討價還價後，最後以 ￥3000 一個人成交，同師傅講左幾樣必食既，其餘o個o的就由師傅挑選。

左邊o個款師傅話係魚既一部份，朋友估係內臟，唔知係真唔係，
不過味道真係一流，一o的都唔腥又唔"流"

呢個 set 總共有 13 件壽司加一碗麵豉湯，食到我地個個捧住個肚出黎，其中一款未食過既魚內臟壽司，入口即溶又唔會好腥，o的海膽亦都好滑好新鮮，￥3000 真係好抵。

食飽返旅館執拾行李準備聽日返名古屋。

秋日紅葉飄雪日本中部六天自遊行 2007 - DaY ThREe

11 月 12 日

天陰有雷雨。

o的雨落左成晚無停過，重行雷添，婆婆整左一頓好豐富既早餐比我地，由於天雨關係，食飽就返房睇電視休息，真係幾 side 架，到十點幾見o的雨細左o的又出去行o下。

我地行出條吊橋度影相，有雨又有風，好凍，部相機都凍到 hang 左幾次，o的山比o的霧遮住，別有一番景致。

影到十一點幾返民宿拎行李走人，搭巴士去下一個目的地 - 高山，車程要兩粒鐘。途中竟然落雪，估唔到睇紅葉變左睇雪，咁大個女算係第一次睇到雪，上次三月出 trip 都見到，不過好少。

去到高山市大約兩點幾，去旅館度放好o的野又出去搵食。高山市出名食飛驒牛，我地即刻衝去丸明食飛驒牛。

我估呢餐算係今個旅程食得最豪既一餐，五個人叫左燒牛肉 - ￥54XX 2 - 3 人份量，￥58XX 4 - 5 人份量，再加一碟雞同兩客戶 Shabu Shabu （￥29XX）。

呢碟係質素差少少o既牛肉，因為份量多所以價錢貴o的 ￥58XX

呢碟就靚少少o既 ￥54XX，牛肉脂肪o既分佈同上面o個o的差好遠，
呢種真係入口即溶架... 而家諗返起都流口水

我唔客氣喇

o 的燒牛肉真係好好食，可能用燒，好香，o的醬汁又好味，分濃味同淡味，我只係試左濃味，味道同o的牛肉好夾好好味，o的牛肉入口即溶，好香牛味又唔蘇，反 而 shabu shabu 比較遜色，可能係o的醬汁影響，兩款醬汁一款喊左o的，另一款麻醬苦左少少同唔夠香，總之唔夠好味啦。

Shabu Shabu o既調味料

牛肉同o的菜

埋單位 ￥20100，除開每人差唔多三百蚊，都唔算好貴。

食飽都只係夜晚五點幾，不過個天巳經黑到好似八，九點咁，o的鋪頭又收得七七八八無野行，唯有去便利店大事搜購，買左便利店飯團返去當宵夜食，途中又落雪，好靚好靚，不過好鬼凍。

之後就返旅館休息。

秋日紅葉飄雪日本中部六天自遊行 2007 - DaY TWo

11月11日
 

一早要搭 9：00 巴士去白川鄉，今日天氣唔多好，落住雨，好彩個巴士站係酒店樓下，梳洗好食埋早餐後出發去白川鄉。

準時搭 8:50am 巴士去白川鄉，原來都好多人去白川鄉，架車差唔多滿座。

上車o個時o的雨細返，車程差唔多要三粒鐘，往白川鄉巴士係有季節性，由四月開始到十一用尾，其他日子會停使，如果要去白川鄉就要經高山o個邊去，車程會長多個半鐘。

中途休息站，我地就係坐呢架巴士

我地走落車影附近既紅葉，呢張睇得出o的紅葉巳經開始枯萎

其實應該唔比落車，因為o的日本人嘈話要去厠所，我地先有機會落車影相咋。

沿途o的雨時大時細，訓o下食o下玩o下好快到達目的地。

白川鄉係世界文化遺產之一，佢既特色除左風景怡人之外，同埋重保留住日本傳統建築，呢o的屋叫「合掌造」，用人手，木材，哂乾既草建造而成。

我地住係一個叫“與四郎”既民宿，一泊兩食，地方雖然簡陋，但勝在老闆娘婆婆夠親切，o的野食又好食。

就係呢間民宿 - 與四郎，好有日本 feel

間房好大，三個人都唔覺迫，每間房都有個電暖爐，
出面落雨又凍，入到黎即刻開著個暖爐暖暖

安頓好行李，雖然落雨都無減我地既興緻，拿拿淋出去遊覽呢個文化遺產。

週圍都有合掌造

如果天氣好的話o的紅葉會靚好多好多．．．

有個大水塘，入面有好多魚，條條都好肥好大

行到咁上下差唔多到食飯時間，於是我地去試呢度出名喬麥麵，熱湯底o的麵淋左o的，冷麵就非常彈牙，唔錯！

食飽又週圍逛逛影相，沿住條路先參觀平田家，可以入屋入面或者上屋頂睇「合掌造」既構造，入場費 300 yen 一位。之後再行上山頂睇白川鄉全景。

白川鄉就係咁大啦

參觀平田家時係出面見到兩條彩虹

日短夜長個天好快黑，晚餐返民宿食，婆婆整左好多野食，味道幾好味架。

住家菜定食，好豐富

出名既飛驒（陀）牛，用個爐燒住再加o的 source 食

本來o的朋友想溫泉，八點幾出去條街一個人影都無，靜英英黑 mum mum，陪佢地行到一半路就折返民宿。

沖涼無野做就訓覺 lu。